راولپنڈی: پاکستان کی فوج کے ترجمان نے جمعہ کو کہا ہے کہ ایران اور امریکا کے درمیان پاکستان کی ثالثی کی کوششوں کے حوالے سے فوج محتاط انداز میں پُرامید ہے۔ انہوں نے یہ بات رواں ہفتے ایک اعلیٰ سطحی وفد کے دورۂ تہران کے بعد اپنے پہلے انٹرویو میں کہی۔
پاکستان کے آرمی چیف فیلڈ مارشل عاصم منیر، جو آٹھ ماہ سے جاری ایران جنگ میں کشیدگی کم کرنے کے لیے پاکستان کی ثالثی کی کوششوں میں مرکزی کردار ادا کر رہے ہیں، رواں ماہ دو مرتبہ تہران کا دورہ کر چکے ہیں۔ ان کا تازہ دورہ پیر کو ہوا، جس میں سعودی عرب اور ترکیہ کے حکام بھی ان کے ہمراہ تھے۔
برطانوی خبر رساں ادارے رائٹرز کے انٹرویو میں فوجی ترجمان لیفٹیننٹ جنرل احمد شریف چوہدری سے جب پوچھا گیا کہ کیا یہ دورے مثبت پیش رفت کی علامت ہیں تو انہوں نے کہا ’’اگر کوئی مثبت پیش رفت نہ ہوتی تو فیلڈ مارشل دو مرتبہ وہاں کیوں جاتے؟ اس لیے جی ہاں، یقیناً۔‘‘
پاک فوج کے شعبۂ تعلقاتِ عامہ (آئی ایس پی آر) کے ڈائریکٹر جنرل احمد شریف چوہدری نے مزید کہا کہ ’’ہم اس صورت حال کے لیے ہمیشہ ’محتاط انداز میں پُرامید‘ کی اصطلاح استعمال کریں گے۔‘‘
انہوں نے کہا کہ اب بھی کچھ ’’طاقتور عناصر اور مخالفین‘‘ موجود ہیں جو سمجھتے ہیں کہ تنازع جاری رہنے میں ان کا فائدہ ہے۔ تاہم انہوں نے ان عناصر کی نشاندہی نہیں کی۔
پاکستان کی مسلح افواج کے ہیڈکوارٹرز کے شہر راولپنڈی میں گفتگو کرتے ہوئے احمد شریف چوہدری نے یہ بتانے سے گریز کیا کہ تہران میں کن امور پر بات چیت ہوئی یا آیا امریکا نے اس دورے کی حمایت کی تھی۔
پیر کو سعودی وزیر دفاع شہزادہ خالد بن سلمان اور ترکیہ کے انٹیلی جنس سربراہ ابراہیم قالن بھی فیلڈ مارشل عاصم منیر کے ہمراہ تہران گئے تھے۔
دفاعی معاہدہ نئے ممالک کی شمولیت میں رکاوٹ نہیں
سعودی عرب، ترکیہ اور پاکستان نے 7 اگست کو ایک مشترکہ دفاعی معاہدے پر دستخط کیے تھے، جس کے تحت کسی ایک دستخط کنندہ ملک پر حملے کو تمام رکن ممالک پر حملہ تصور کیا جائے گا۔
ایران جنگ کے نتیجے میں علاقائی اتحادوں کی نئی صف بندی اور مشرقِ وسطیٰ میں وسیع تر تنازع کے خدشات کے باعث مکہ مشترکہ دفاعی معاہدے کی اہمیت مزید بڑھ گئی ہے۔
اگرچہ معاہدے کے تینوں رکن ممالک کا کہنا ہے کہ اس کا مقصد اجتماعی دفاعی مزاحمت اور علاقائی سلامتی کو یقینی بنانا ہے، تاہم تجزیہ کار اس معاہدے کی پیش رفت کو ایران اور امریکا کے درمیان محاذ آرائی کے اثرات سے نمٹنے کے لیے علاقائی طاقتوں کی کوششوں سے بھی منسلک قرار دیتے ہیں۔
پیر کو ہونے والے مذاکرات کے بعد ایران کی سپریم نیشنل سکیورٹی کونسل کے سیکریٹری محسن رضائی نے کہا تھا کہ علاقائی سلامتی کو غیر ملکی مداخلت کے بغیر خطے کے ممالک ہی کو یقینی بنانا چاہیے۔
جمعے کو جب احمد شریف چوہدری سے پوچھا گیا کہ کیا ایران بھی اس دفاعی معاہدے میں شامل ہو سکتا ہے تو انہوں نے کہا کہ معاہدے کی عبارت نئے ممالک کی شمولیت میں رکاوٹ نہیں بنتی۔
انہوں نے کہا:
’’جو بھی اجتماعی دفاعی مزاحمت اور علاقائی امن کے مشترکہ تصور پر یقین رکھتا ہے، وہ کیوں شامل نہیں ہو سکتا؟ سب کو خوش آمدید کہا جائے گا۔‘‘
تاہم انہوں نے واضح کیا کہ اس حوالے سے فیصلہ معاہدے کے تین بنیادی رکن ممالک کی سیاسی قیادت کو کرنا ہوگا۔
معاہدے کے تحت سعودی عرب میں مزید پاکستانی فوجی دستوں کی تعیناتی سے متعلق سوال پر احمد شریف چوہدری نے کہا کہ اس کا انحصار صورت حال اور دونوں ممالک کی سیاسی قیادت کے فیصلوں پر ہوگا۔
انہوں نے کہا کہ پاکستان سعودی عرب اور مکہ مکرمہ و مدینہ منورہ کے مقدس مقامات کے دفاع کے لیے پُرعزم ہے۔
ساتھ ہی انہوں نے واضح کیا:
’’ہم یمن کے تنازع کا حصہ نہیں ہیں، کیونکہ یہ یمن کا داخلی تنازع ہے۔‘‘
ایران جنگ کے باعث سعودی عرب اور یمن کے ایران نواز حوثی گروپ کے درمیان لڑائی دوبارہ شروع ہو گئی ہے، جس سے خطے میں وسیع تر جنگ کے خدشات بڑھ گئے ہیں۔
